5 Boeh Maksiet Yang Sigra Geubalah Lee Allah

Share This

Assalamu'alaikum, wareh syedara

Tuha dan muda, inong ngon agam

Tapujoe Allah, tiep-tiep kutika

Geutanyoe hamba, nyan kewajiban

Seulaweut Saleum, bek sagai lupa

Akan baginda, Nabi nyang khatam

Ateuh sahabat, dan keluarga

Seupanyang masa, neubri ya Tuhan

Pabrek seumen, sideh di Lhok Nga

Aceh Utara, PIM hai rakan

Ibnu Majah, bak saboh masa

Geurawi haba,Nabi meukalam

5 boeh maksiet, geubalah sigra

Hana Geutunda, meuka ta lakukan

Peureutama phoen, soe meuzina

Seucara nyata, teurang-teurangan

Allah geubalah, keu-nyan Hamba

Tha'un jirasa, subagoe balasan

Peunyaket laen, geutamah lanja

Nyang hantom teuka, yoh sigohlom nyan

Nyang kedua, peukureung neuraca

Atau syedara, geuweuk sukatan

Seubagoe bala, khueng jiteuka

Juga dirasa, raseuki keseumpitan

Geutamah lom, deungon bala

Lalem penguasa, tan keadilan

Teuma nyang keu-3, tasamboeng haba

Nyang meuharta, zakeut han tunaikan

Allah peutheun hujeun, wap nyan dausa

Mangat jirasa, balasan Tuhan

Meukon na binatang, ateuh rhueng donya

Hujeun han teuka, berkelanjutan

Nyang ingkar janji, keu-4 hai syahra

Allah bri kuasa, keu-musoh awak nyan

Akan Jireubot, seubagian harta

Lee miskin-papa, nibak masa nyan

Nyang teurakher, bila Penguasa

Hukom ka jiba, kon lagee aturan

Kiban meuheut droe, meunan jilaksana

Jai meubeda, deungon Al Qur an

Bicah prang saudara, Allah bri bala

Aman sentausa, chiet ka teunte tan

Ureung lam nanggroe, lam huroe hara

Lee manusia, nyang jeut keu korban

Meung ka tapubuet, man 5 perkara

Juga ka nyata, bala-bala nyan

Hana lee kebaikan, akan tarasa

Meunan sayyidina, watee meukalam

Jinoe ci kaji, wahee syedara

Banmandum bala, peuka ta-rasakan???

Meusoe teulanjoe, ka meukeurija

Taubat sigra, lakee amponan

Ca-e lon pada, lon toep haba

Tacok makna, nyang kebaikan

Peumeu'ah ulon,

Pat na cupa, atawa kesilapan