Wafeut Siti Fathimah

Share This

Subhanallah, wabihamdihi
Fatimah siti, anuek maulana
Masa gog wafuet, ya Rasulullah
Kalhueh neupeugah, wafuet Aneukda

Dilikoet gohnyan, siti fathimah
Bak asoe rumoeh, mula pertama
Alhamdulillah, wabihamdihi
Wafuet siti, ulon calitra

Yoh wafuet nabi, meunguncang ras
Wafuet fathimah, meunguncang donya
Tingai ngoe anuek, hasan ngoen husen
Sit hana laen, agam ban dua

Ibrahim teuma, nibak Mariah
Ban lhe ka sudah, wafuet ka lama
Teuma yang inoeng, yang phoen Fatimah
Zainab rukaiyah, silumueng dua

Di ummi kalsom, meuhat yang tuloet
Zainab masa cut, meuninggai donya
Ali meukawen, dengan Fatimah
Masa di makah, gohlom neubungka

Usman meukawen, dengan Rukaiyah
Pih sit di mekkah, tanoeh mulia
Hana trep teuma, wafuet rukaiyah
Nabi peunikah, kali keudua

Neu pulang balee, noen ummi kalsom
Hana padum thon, wafuet lom teuma
Tinggai Fatimah, laen hana le
Anuek boh hate, saidil ambiya

Lhueh wafuet nabi, teuma le dudoe
Nam buluen sampoe, Fatimah zuhra
Dua boh anuek, cut puteh licen
Hasan ngoen husen, ubit goh raya

Anuek di ali, bak inoeng laen
Hana hai polem, ulon calitra
Uroe keu siblah , buluen ramadhan
Nibak supoetnyan, ka leupah asa

Neucoek ngoen tima, neuba deungoen ie
Sit meunan sabe, dile yang kaka
Neuhoe ngoen anuek , laju neupeutoe
Meusigoe sigoe, teuka ban dua

Neupeudoeng anuek, di atueh bate
Neuple bak ule, peubasah muka
Di anuek tuha, geumanoe keudroe
Teuma di adoe, mantoeng buet poma

Di phon di ule, sampoe u gaki
Madum neugli gli, bandum anggota
Dang neu uet tuboh, anuek boh hate
Sajan ile, dengan ie mata

Anuek ka tahee, aduen ngoen adoe
Teungieng poma droe, tijoeh ie mata
Anuek yang tuha, geutayoeng meunoe
Pakon bunda droe, neuroe ie mata

Yangka u likoet, jan kamoe manoe
Hantom lagenyoe, pakon hai bunda
Laju neujawueb, aneuk boh hate
Singoeh hanale, peumanoe gata

Sang sang jan laen, anuek hana le
Meunan dalam see, leumah bak poma
Uloen hai anuek, sang katoe mate
Saying boh hate, bandua gata

Gata mantoeng cut, anuek boh hate
Hana saboeh le, urueng usaha
Saudara dilon, bandum katan le
Ka habeh meucre, ngoen donya fana

Seubab keunan roet, anuek lon pike
Nyan keuhjuet ile, dengan ie mata
Kadang juet saket, mumang lam ule
Hana saboh thee, di atueh tika

Hasan ngoen husen , di atueh bate
Neucoek neupangke, neucoem ngoen neuwa
Anuek boh hate, anuek meutuah
Peulara allah, gata bandua

Neucoek le anuek, peu ek bak teumpat
Uroe ka jiloep, buka puasa
Uroe keu siblah, malam dua blah
Oh wate sudah, buka puasa

Neusoek seuleukom, seumbahyang meugreb
Sunat ngoen wajeb, reungang hantom bla
Ohlhueh saleum, tamoeng lam wirit
Beungoeh ngon supoet, meunan biasa

Suloeh yang akhe, sabe neubeudoeh
Oh teulhueh suboeh, lom baca doa
Neubaca quraan, neukhuen seulawuet
Zikir neuseubut, bermacam rupa

Lage ka neuyue, le rasulullah
Hana meu ubah, tiep tiep kutika
Nibak malamnyan, teungoeh lam wirit
Jiteuka saket, ngoen tiba tiba

Teungoeh meuzikir , neuseuboet allah
Lammurakabah, atueh musalla
Neupeuyum punyum, tuboeh neu saket
Neupeuseb wirit, dalam musalla

Seulawuet pih lhueh, meutamah saket
Fatimah marit, deungan anuekda
Neutawoek anuek, mandua sigoe
Aduen ngoen adoe, laju le teuka

Neukhuen bak anuek, sajan yue cupet
Badan lon saket, e bijeh mata
Ulon hai anuek, malamnyoe wafuet
Gata mantoeng cut, lon paban teuma

Gata ubit bit, poma hanale
Anuek boh hate, ka meunan kada
Gata lon seurah, bak hukom allah
Meuduek ngoen ayah, siat dang raya

Rasia bak lon, bandum ka leumah
Ya Rasulullah, bunoe neuteuka
Neupeugah bak lon, kajuet meukeumah
Janji bak allah, katroek kutika

Ulon neujak tueng, le rasulullah
Hanjuet tau bah, meusiklep mata
Gata e anuek, lon tinggai siat
Meunan amanat, rasul ambiya

Bak le seulawuet, keu rasulullah
Keu ma ngoen ayah, bak le that doa
Gata e anuek, lon seurah bak allah
Dang dang meutuah, taseutoet poma

Ohban neudeungoe, ka peusan meunoe
Seudeh han bagoe, anuek ban dua
Bunoe yoh supoet, pih kalhueh sigoe
Wate bak manoe, meugreb jiteuka

Wahe e bunda, pakri boh hate
Soe kalon tanle, kamoe ban dua
Oh hana bunda, hana meusampe
Dak jitem bahle, sigoe tagisa

Oh tanle bunda, hana soe papah
Adak na ayah, han jitem sama
Karena ayah, leupah tiep uroe
Digobnyan laloe, suroh rabbana

Bak kadang kadang, keu kamoe tuwoe
Keulileng nanggroe, peukoeng agama
Ohban neudeungoe, anuek khuen meunan
Fatimah yohnyan, tijoeh ie mata

Gata e anuek, ban hukom allah
Di Rasulullah, keusyik di gata
Yatim lam kandoeng, ka tanle ayah
Juet geuplueng bagah, kan tale poma

Tuhan peulara, anuek bek gundah
Milek di Allah, tuboeh ngoen nyawa
Wahe boh hate, cut puteh licen
Bek le tameusyen, anuek keu bunda

Tameuduek siat, ngoen bunda laen
Dang dang meukawen, bandua gata
Bek that tagalak, keu donya dhalem
Seubab na laen, nanggroe bahgia

Dang dang chit tawoe, keudeh bak Allah
Di Rasulullah, pih geupreh gata
Bak donya fana, bacut faedah
Hampue that leupah, keujih ta hawa

Nanggroe bahgia, keu hamba allah
Ngoen Rasulullah, tamoeng syuruga
Meunyoe wafuet lon, anuek meutuah
Sajan ngoen ayah, peumanoe bunda

Gata uet tuboeh, deungoen peusuci
Deungan siram ie, bek tapeujula
Lage geuwasiet, le rasulullah
Peugah bak ayah, Ali Murtadha

Seubab bak ayah, pih ka geuwasiet
Masa goeh wafuet, saidil ambiya
Pat geuyue tanom, le rasulullah
Tayoeng bak ayah, e bijeh mata

Pakri yang wasiet, nibak pang ule
Yoh masa dile, bak ayah gata
Saidina Ali, nibak supoetnyan
Hana meusajan, buka puasa

Saidina ali, nibak meuseujid
Oh kalhueh meugreb, ka neupreh insya
Saidina Ali, dalam watenya
Hate tan seunang, laju neugisa

Hate di Ali, meutampoe tampoe
Neubeudoh neuwoe laju neugisa
Oh troek u rumoeh , ali ka neuwoe
Laju neupeutoe, nibak anuekda
Ubak Fatimah, ali neutamoeng
Neukalon bangoen, Fatimah zuhra

Ali neukalon, Fatimah saket
Laju meureb reb, deungan ie mata
Seubab teu ingat, keu wasiet nabi
Neupeugah siti, buluen puasa

Lhueh wafuet ulon,khuen rasulullah
Siti Fatimah, dilikot hamba
Ali le teuduek, sajan Fatimah
Anuek dua boh, di unuen poma

Ali teumanyong, pajan phon saket
Neumat neuceupet , sapai ban dua
Neujaweueb rijang, bunoe yoh meugrep
Teungoh lon wiret, leumoh anggota

Siluroh tubuh rasa sang saket
Jaroe lon jeupet, hana le rasa
Langkah lon abeh deungon razeuki
Aneuek ngon Ali tinggai di donya

Katroh kutika jeumpa bak Rabbi
Lon seutot Nabi Saidil Ambia
Malam nyoe tinggai judo pahlawan
Lon woe bak tuhan bak rabi’ul ‘akla

Malam nyoe tinggai Hasan dan Husen
Teuma dum laen ureueng di lingka
Lon tinggai bandum ahli lam rumoh
Tinggai peurumoh Saidil Ambia

U padang mahsya meurumpok singoh
Bah sigo teungoh sajan saidina
Ulon geujak tueng le malaikat
Tinggai sahabat kawom wanita

Eya Tuhan ku neubri seulamat
Umat Muhammad agam ngon dara
Deungon sahabat peuet neubri bek jeu oh
Bandum bak seunggoh peu kong agama

Donya akhirat, bak saboh lampoh
Nyang sapat piyoh ,yub payong raya
Iman islam ,bandum bak kukoh
Beukong that saoh ,bek pura-pura

Bak ta beurangkat,nanggroe that jeu-oh
Beu tuhan peutroh, ban cita-cita
Liwaul hamdi, leumah di jeu oh
Bendrang seumeulhoh, meu cahya-cahya

Keudeh meurumpok, bak meukhak meu kheum
Keudeh bak meusyen, aneuk dengon ma
Oh lheuh yub payoeng, bak ule titi
Bak kulam nabi, tamaen teuma

Batee di pante, pudoe ngon intan
Alon geulumbang, sang su biola
Tujoeh wareuna, di dalam kulam
Bandum geulumbang, pujoe rabbana

Riyeuk meu alon , suara macam
Tujoh ribee thon , sang si kutika
Di bineh pante , macam tanaman
Soe nyang troh keunan, hate that suka

Si teugok tajeb , rasa jih le kri
Han teugrah-grah le, siumu masa
Nyang manoe sinan , badan beureuhi
Umu kalawi, meugisa muda

Lon tinggai judo, pahlawan gagah
Lon seutot ayah, saidil ambia
Lon seutot rasul , pang hulee umat
Keudeh keuh teumpat, meureumpok teuma

Aneuk lon dua , tinggai ngon Ali
Beu jeuroeh neutembri, keujih neujaga
Beuthat neugaseh, ke hasan husen
Bak leubeh neucen , aneuk laen dua

Beu that na aneuk, bak inoeng laen
Bak leubeh neucen, aneuk hana ma
Adak neupeuduk, bak ma nyang laen
Bak galak neutem, meuntui hana ma

Bakna neumalee, keu Rasulullah
Cuco neukubah , beuget neujaga
Teuma lagi , lom e wahe Ali
Ulon syom gaki, neu ampon dosa

Hana yang dhahir, kadang na bathen
Bak neubri izin, hate murthada
Hanjeut han teupeh, aweuk ngon ringkan
Geutanyoe insane, meunan biasa

Ali neujaweub, judo meutuah
Alhamdulillah, ngon lon tan dosa
Ulon keu gata , nyang na meusalah
Karoh lon peugah, dilee nyang hana

Masa tamariet, gata ngoen peudeung
Lon sangka ureueng, tasoem lee gata
Meuah dosa lon , dilee ka teusreung
Nibak phui bandum, dalam ngon luwa

Fathimah seu ot, wahe ya Ali
Hana ulon bri, keudroe meudosa
Hana patoet, meubak ureueng binoe
Keu ureueng lakoe, geubri meudosa

Fathimah pih lom , mariet ngoen aneuk
Jaroe neugusuek ,di ateuh boh pha
Meuah keu bunda, aneuk boh hatee
Bathen ngoen lahee, bandua gata

Masa loen tingkue, loen peu ek peutroen
Masa lam ayoen, loen peu eh gata
Kadang meuseumpoem, bak lhom ayoen
Bunda tan meunyum, ka saket gata

Kadang meuseupet, jampang loen pangkee
Poma tan geuthee, meularat gata
Kadang meuseumpoem, bak peu ek peutron
Meuah keu ulon, bandua gata

Kadang bak lon coek, di dalam ayoen
meuklok jaroe lon, bak badan gata
Bak lon peumanoe, bungoh ngoen seupot
Kadang ie jilop, geulinyueng gata

Bak ulon plee ie ,diateuh badan
Kadang meujantang, ngoen taloe tima
Kadang jan teulat, lon boeh makanan
Dan Lom nibaknyan, ulon dhoet gata

Kadang di bunda, keudroe dang siboek
Oh gata tawoek, loen deungoe hana
Meu ah keu bunda, aneuk boeh hatee
Supaya bek le, soal di mahsya

Aneuk ban dua, rasa ka reuloeh
Seubab geuteu oh, aneuk meudosa
Laen pih le lom, fathimah wasiet
Ali meureb-reb , teubiet ie mata

Ali neu angkee. Wasiet fathimah
Bandum amanah, Ali neurila
Bak akhe nariet, siti fathimah
Laila hailllallah, peunutoep kata

Yoehnyan le laju, bungong mangat bee
Layoeh ngoen layee, bungong syuruga
Teutoep ngoen babah, lidah ngon langet
Jaroe teuduek get, di ateuh dada

Aneuk ngon Ali, ban lhee neuh sajan
Seulamat jalan , bungong syuruga
Wafeut fathimah, leunyap bak wirit
Wafeut lam saket, pujoe rabbana

Wafeut lam zikir, kalimah iman
Husen dan hasan, reubah ban dua
Hasan ngon husen, seureta Ali
Masa nyan le, laju neu baca

Neukheun yoeh nyan, innalillahi
Wainna ilaii rajiuun
Bit bit geutanyoe , cit milik Tuhan
Bandum bak goebnyan, keunan ta gisa

Aneuk mantoeng cut, bunda ka neuwo
Aduen ngoen adoe , meugrak that rasa
Bukon that sayang , bintang ateuh glee
Cahaya hana le, jitoep le miga

Anuek mantoeng cut, bunda hana lee
Katroh teukeudi, pangge rabbana
Oh lheh wafeut , siti fathimah
Hana neu peugah, bak ureung lingka

Hana neubri thee, bak ureueng nanggroe
Ubak kawom droe , tan neubri haba
Hana meusaboeh, nyang teuka keunan
Cit lhee digoebnyan,dengan aneukda

Hasan dan husen , mantoeng dalam moe
Di Ali sidroe, sampoh ie mata
Ali neu marit, ka putoeh bak moe
Wahe aneuk droe, geutanyoe saba

Jinoe hai aneuk , laen tan sidroe
Cit lhee geutanyoe, di rumoh tangga
Bak ureueng laen , singoh ta peuthee
Geutanyoe ban lhee , peumanoe sigra

Ulon peumanoe, gata peusuci
Aneuk beudoeh le, sigoe bandua
Yoh Masa mantoeng, di Rasulullah
Cit ka neupeugah , wafeut ma gata

Han geubri peutrep, yue tanom bagah
Lagee amanah , han loen jeut tuka
Teuma le laju, dumpeu kakeumah
Neucok jeunazah, fathimah zohra

Alat ngoen kafan, kana di rumoh
Hana le mehmoeh, Ali neu mita
Hasan ngon husen , Ali peugah kri
Goebnyan neuplee ie, aneuk uet dua

Hasan ngoen husen, dua peusuci
Neu peutroh dum ie , jeut bulee roma
Oh lheuh seumanoe , ngoen ie seumbayang
Pe eh lam kafan, bungoeng syuruga

Neuboeh ngoen bajee, neuple bee -bewan
Neu ikat kafan , limoeng boeh punca
Alamat tanda, urueng islam
Isyarat meunan , bak asai mula

Ali seumbahyang, ateuh jeunazah
Goebnyan kasusah, ka hanjeut geuba
Ngoen tiba-tiba, teukeudi tuhan
Nibak malamnyan , abi zar teuka

Abi zar kasat, geujak bak Ali
Kapadum lawi, meurempoek hana
Abi zar pih troeh, neukeutoek pinto
Ali neu tanjo , laju neubuka

Abi zar tamoeng, neungieng jeunazah
Ali neupeugah, fathimah zuhra
Abi zar taheu , kateudong nafah
Sabab tan meugah, haba u luwa

Hana soe teupeu, wafeut fathimah
Abi zar joeh-jah, manoe ie mata
Abi zar tanyoeng, pakoen roeh meunoe
Sabab lagee nyoe, wasiet maulana

Han neubri peutrep, le Rasululah
Wafeut fathimah , yue tanoem sigra
Deungon seubab nyan, ulon peu bagah
Ngoen rasulullah, bek teumeureuka

Bukon ulom som , wafeut fathimah
Singoeh lon pegah, wahe abi zar
Wahe abi zar, kajeut seumbahyang
Bek lewat malam , kubu tabuka

Abi zar teuma, laju seumbahyang
Oh te lheuh salam , neubaca do’a
Teuma le laju , neucok jeunazah
Hingga kaleupah, bak kubu neuba

Hana meusidroe , meureumpoek ureueng
Di dalam buleun, badrang cuaca
Oh ban sare troh , bak teumpat kubu
Neu peuduek laju , bungoeng jroh rupa

Neu buka uruek, ngon sigra laju
Dalam buleuen hu, meu caya-caya
Abi zar teudoeng, di dalam kubu
Neupeugleh laju, ban siseu lingka

Oh lheuh selesai, neupeujroh kubu
Abi zar laju kalam, geu buka
Abi zar teudoeng, di dalam kubu
Neu mariet laju, kalam neu buka

Wahe e qubu, gata ka teuhah
Keuhendak bak Allah, katroek kutika
Keunoe bak gata , kamoe jak keubah
Jeunazah fathimah, aneuk maulana

Keu nibak gata , kamoe jak seurah
Geunaseh Allah, bungong syuruga
Peutimang beujroh , wahe e kubu
Nyoe Tuboeh ibu, mukmin lam donya

Aneuk di nabi, lom rasulullah
Malam nyoe meuseurah, keunoe bak gata
Ibunda hasan , dua ngon husen
Nyang kamoe meucen, kenoe kamoe ba

meunyoe keuh judo, saidina Ali
Uloen peuturi , kubu bak gata
Nyoe keuh ureueng, sabe lam wirit
Seulama hudep, tiep-tiep kutika

Nyoe keu ureung, sunggoeh ibadat
Kamoe jak intat, keunoe bak gata
Nyoe keuh ureueng, genaseh allah
Jinoe lon keubah , bumoe ba gata

Kubu lee teuma ,laju jipeugah
Ngon izin allah, ban manusia
Wahe abi zar, tan kamoe turi
Aneuk di nabi , fathimah zohra

Hana lon turi, geunaseh Allah
Hana lon papah, bungong syiruga
Hana lon turi, ma hasan ngon husen
Nyang gata meusyen, di muka donya

Han lon turi , judo pahlawan
Hana lon tuban, anuek maulana
Hana lon teupeu, sunggoh ibadat
Takeubah ligat, tajak weh gata

Wahee abi zar, hana pue tapeugah
Hana peu takisah, asoe syuruga
Hana peurelee, lage ta peugah
Kajeut takeubah, jakwoe di gata

Kamoe meukeusud, hate nyang tabah
Nyang gata peugah , hana meuguna
Kamoe kalon, kon mantong lahee
Mukmin lam hate, nyang kamoe mita

Nyang na seulamat, iman di hatee
Bak su kret mte , bunoe yoeh mula
Nyang roh jiteoh, kepada tuhan
Bak watee nyawoeng, teungoh meuhila

Nyang na seulamat, kalimat iman
Nabi ngon tuhan, hana ji tuka
Nyang na seudia , geuba amalan
Kamoe peutimang , dengon sijahtera

Di dalam kubu , laju lam seunang
Uroe keumeudian, dalam syiruga
Nyang leukang iman, bak watee seukreut
Domna that azeb, kamoe pareksa

Rusoek meubanja, sigra beu teulheub
Pangkat ube bleut, hana meuniet na
Abi zar dengoe, jawaban kubu
Gobnyan ka ngilu, jeuet-jeuet anggota

Dum aneuk nabi, lagee nyan meusu
Aneuk geutanyoe, leh pakri rupa
Neucok jeunazah, peutron lam kubu
Neu tanoem laju, sajan ngon do’a

Oh lheuh peu kubu, teuliqin sudah
Neubeudoh bagah, laju jak gisa
Oh beungoh uroe , laju ka meugah
Ureueng madinah , hatee dum duka

Oh ban hana lee, siti fathimah
Nanggroe madinah, tanle cuaca
Tuha ngoen muda, kaleukang hate
Geudengo tanle, fathimah zohra

Tuha ngoen muda, bandum ka geutron
Geujak keumeunjong, bandum semua
Agam ngon inong, meusaho keunan
Geutanyong yohnyan, jeunazah ho ka

Saidina Ali, geubri jawaban
Kalheuh lon tanom , beuklam ka jula
Oh ban geudeungo , geukheun geutanom
Bandum geujak tron , Ali murthada

Inong ngon agam, beungeh ke Ali
Pakon han geubri , meusikrak haba
Pakon ka geusom, wafeuet fathimah
Bandum ka beukah, hate lam dada

Ureueng madinah , beungeh keu Ali
Sabab tan geubri , peuleumah rupa
Masa mantoeng droe, di rasulullah
Ka lheh geupeugah , bak kamoe dum na

Watee jan wafeut , siti fathimah
Di uroe singoh , dilikot hamba
Soe nyang seumbahyang, atueh jeunazah
Ulon angke sah, tamoeng syuruga

Bandum geu angke, oleh janjongan
Deungan seubabnyan, beungeh jih raya
Teuma di Ali, jeut geu peubagah
Bak rasulullah ,wasiet kalheuh na

Jan wafeut siti ,neuyue beu bagah
Seu uem bek gadoeh, nibak anggota
Teungoh meu moe-moe, geu musyawarah
Tanyong peue sebab, lageu nyan cara

Peu salah kamoe , peue salah Ali
Nyang jeuet han geubri , kamoe ngieng rupa
Ali neu jaweub , deungon sigra lee
Peupuleh hatee , ureueng nyang teuka

Ulon tan silap, didron tan salah
Ulon meutuah , gata bahgia
Meunan neu wasiet, di rasulullah
Meunyo lon rubah, takot binasa

Masa nyan bandum, ka teuhah abah
Ohban neupeugah, wasiet saidina
Senyueng ngen jaroe, meu meah-meah
Ie mata joh jah , basah mieng dua

Teuduek kisahnyan, di keu sikeujap
Ulon riwayat , Ali murthada
Oh neu tanom, siti fathimah
Bak Ali leumah, saboh bicara

Neupeugot laen, saboh treuk kubu
Saban that buhu , santeet ban dua
Oh lheuh peugot , laju lee neuwoe
Abi zar meunoe, katrep geugisa

Kubu dua boh , saboh tan asoe
Jarak han toe, antara dua
Hana soe tuoh, hekmah gobnyan
Pakoen lagee nyan, hantroh taduga

Hana tatukri , tujuan gobnyan
Keudeuh habaran, tasambong teuma
Geubeudoh sidroe , nyang ulee kawan
Geutanyoeng rijang , bak Ali murthada

Wahee ya Ali, jinoe ta peugah
Dipat daerah , kubu neubuka
Tempat ta tanom, siti fathimah
Tulong peuleumah, bak kamoe dum na

Tan meungieng rupa ,kamoe ngieng kubu
Peuleumah laju, wahe murthada
Ali neujaweub, ulon peuleumah
Hana peue susah, jinoe ulon ba

Saidina Ali, dikeumeu beurangkat
Laen diseutot, tuha ngoen muda
Oh ban sare troh, bak teumpat kubu
Peuleumah laju , sigoe bandua

Ali peuleumah. kubu dua boh
Lam dua saboh, asoe jih hana
Dalam dua nyang , saboh meu asoe
Tapileh keu droe , antara dua

Teuma geujaweub, le ulee kawan
Pakon lagee nyan, wahee murthada
Nyang siri qubu, siti fathimah
Keupue neupeugah, di dalam dua

Kubu neupeugot , hana meusapat
Oh ngieng jeurat, saban ban dua
Geutanyong-tanyoeng, hana geupeugah
Sabee di babah , antara

Hana soe turi , nyan toh meuasoe
Harum han bagoe, saban ban dua
Bee menyeik , deungon keutanggi
Ban dua saree , geulhom bak jeumpa

Ureueng nyang seutot. sayang bukon lee
Meumet-met hate , tuha ngoen muda
Ureueng madinah, geumoe meure-re
Nyang toh nyang tentee, geuturi hana

Han geujeut deusak, saidina Ali
Pahlawan nabi, hebat that rupa
Oh ban lheh kalon, kubu fathimah
Geuwoe le bagah , tuha ngon muda

Urueng lam nanggroe, teu tahe –tahe
Seubab bintang hu , hana lee rupa
Dum urueng inong, meutajo-tajo
Tan neuturi kubu , fathimah zohra

seubab buet Ali, pahlawan meugah
Gobnyan that leupah, geusom rahsia
ureueng zairah, rata jeut sagoe
geujak dua ho , dalam calitra

ureueng meukunjoeng, keudeh ngoen keunoe
bah ureueng nanggroe , bah ureueng luwa
hasan ngoen husen , tapiyoh kisah
Ali nyang gagah, piyoh calitra

wahee saudara , muslimin dan muslimat
umat Muhammad, bandum ubena
calitra wafeut , keu siti fathimah
soe nyang keubah, raya that pahla

tanda jih kawan , sajan fathimah
soe-soe meutuah, jiteumee baca
atau jih deungo , wate gob peugah
lam dua surah , geutanyoe bak na

soe nyang keubah, caitra biek nyoe
bah teuduek keudroe, meuteumee pahla
wahe saudara, bandum yang deungo
pakriban bunoe, kubu calitra

seudang fathimah , ureueng kateuntee
nyang tamong dilee, dalam syiruga
ek chit lagee nyan, kubu tan malee
aneuk pang ulee , hana ji kira

meudum geutanyoe, ka habeh lagee
han meupat euntee, mandum anggota
meungka meupaloe , beunoe bak singkreet
laju meusangkut , hanale guna

oh troh bak kubu , laju meupaleet
meunyo lam seukret, kalheuh binasa
kaleumoh iman, dalam jantong see
oh watee matee, sinan bek ceudra

beuroh seulamat , iman meusampe
di dalam hate , allah ji baca
yang leukang , bak sikreuet mate
karoh lam kafe, habeh keunira

diphoen bak kubu, laju meularat
hana le ubat., laju neuraka
kafe iseulam, disinan meuhat
bak pinto sukreuet, syuruga neuraka

meunyoe bak sukreuet, sinan kaleupah
bak kubu pih glah, han sapee mara
deungon amalan , pih le geukubah
meususah payah , yoh dalam donya

di padang masya , han apoh apah
sajan fathimah , yuep payoeng raya
fathimah lambe, ureueng meu iman
piyoeh disinan, ngoen hate suka

tan le geuhisap , bak ulee titi
neuba le nabi, saidil ambiya
keudeh peuniyoeh, bak kulam nabi
sapat ngon siti, kaom wanita

Wahe saudara ,kawom muslimin
Saidil mursalin , neupreh di mahsya
Wahai saudara , kawom muslimat
Aneuk muhammad , geupreh di mahsya

Taseutot goebnyan, jalan ibadat
Bak koeng tamumat, bak ujong punca
Wahe saudara, ingat keu untoeng
Bak uroe langsoeng, kubu ngon gata

Soal lam kubu , k0n bacut-bacut
Bak nyawoeng teusuet, meuribee bala
Oh trok bak kubu, laju geu peuloep
Ta ingat bacut, keunan meugisa

Neutueng nasehat, saudara disinoe
Pakri bagoe , kubu meuhaba
Seudang fathimah, urueng ka teuntee
Nyang tamoeng dilee, dalam syiruga

Meugoeh lom tamoeng, siti fathimah
Laen goh keumah , kawoem wanita
Wahe saudara, bek boeh-boeh laku
Jipreh le kubu, tuha ngon muda

Teungoh na watee, yoeh mantoeng umu
Tapubuet laju, suroeh rabbana
Tuhan neupeujeut, jen deungon insan
Yue seumah gobnyan, jeuet-jeuet kutika

Neuyue ibadat, uroe ngon malam
Sangat neularang, peusetot donya
Nyang geugheun donya, na dua macam
Nyang phon teuseulam , bangke nyang hina

Ureueng nyang seutot , asee geupeunan
Panghulee alam , meunan neusabda
Kedua bagai , ibarat ladang
Teumpat tanaman, geutanyoe pula

Nyang neucok hase , uroe keumudian
Ileumee ngon amai, sinoe usaha
Bukan that seudih, nabi Muhammad
Bak neupreh umat , di padang mahsya

Umat mubalek, konle ban insan
Lagee bui itam , nyang ladoem rupa
Lagee keulede, pih saboeh macam
Bukon that sayang , soe turi hana

Aneuk ngoen nabi, neupileh umat
Watee ta ingat, tijoh ie mata
Tujoh ploh lhee saf, umat muhammad
Nyang na seulamat , cit saboeh saja

Tujoh ploh dua, bandum lam seusat
Nyang jeut keu umat, cit saboh banja
Aneuk ngon nabi, ie mata tijoeh
Umat dum gadoeh, oh troeh u mahsya

Meung oh tapikee, hate teuh reuloeh
Saleh soe gadoeh, watee ta mita
E ya tuhanku, berkat muhammad
Neubri seulamat, kamoe sineuna

Dengan beureukat, makjizat nabi
Kamoe bek neubri , gadoeh di mahsya
Dengan beureukat, siti fathimah
Iman bek punah, di dalam dada

Pakri ban sekreuet, di goeb nyan
Neubri bak meunan, keu kamoe dum na
Neubri meusaho , kamoe ngoen gobnyan
Kamoe nyang inong, keunan meuteuka

Di ureueng agam , sajan janjongan
Diyueb naungan, liwaul hamda
Alhamdulilah, pujoe keu rabbi
Niekmat beu neubri, keu bandum hamba

Oh noe keu tamat , riwayat siti
Geuwoe bak rabbi , fathimah zohra
Soe – soe nyang dengoe, bak gaseh hatee
Soe-soe nyang pike, bak lapang dada

Seureuta ta ingat, keupada mate
Dunia nyoe tacre, bak saboh massa
Mita amalan, keu beukai matee
Bek lalee sabee, peuseutot donya

Donya tacoek, sikada hajat
Bek sampe lewat, rusak binasa
Donya geupulang , keu ureueng kaphe
Di jih hana le, geubri syuruga

Peu –peu jipeubuet, geutham hana lee
Keujih geupupre, niekmat lam donya
Keu ureueng mukmin, gampoeg susahan
Bukoen disinan, peu peunoh hawa

Nanggroe akhirat, tempat seunangan
Bak donya taulan, tempat goeb hawa
Bek roh tareupah , nekmat si kaphe
Di jih hanalee, kaseb lam donya

Meunyoe ta seunoh, aleran kaphe
Leupah teukeuse, kasalah raba
Seumbahyang hana, puasa pih tan
Seupo pakayan , tacuba kira

Bak buet yang maksit, peu peu yang geutham
Kon hak iseulam , kaphe po jeumba
Bek tajak seunoh , peunajoh kaphe
Tapeutheun hate, deungon anggota

Donya tutopan, bagi si mukmin
Hana pat meuen, meu ubee seuma
Di ureueng kaphe, di sinoe meuen
Di ureueng mukmin, akhirat teuma

Keudeh keuh teumpat, pepeunoeh nafsu
Jeut pubuet laju, kri-kri nyang hawa
Di sideh nanggroe, teumpat seunangan
Hana lee geutham, peu-peu nyang suka

Di sideh teumpat ,bak meukhem meukhak
Meuho nyang tajak, meusuka ria
Taduek lam kandran, langkah tan meugrak
Meugalak –galak , ngon sabe muda

Luwah syuruga, bagi sidroe-sidroe
Ube donya nyoe, tuhan bri jeumba
Dalam syuruga, hana le kakooh
Hana teumpat toeh, dua peukara

Dalam syuruga, makanan haloeh
Badan direu’oh, beu minyeuk ata
Taduek lam donya, tapajoeh tatoeh
Najih lam tuboh, sabe taba-ba

Talakee bak po , uroe ngon malam
Bak gampong adam , beutroh ta gisa
U bak nanggroe , keudeh ta ulang
Bak gampong adam, ngon nek ti hawa

Keudeh nyang gampoeng, ureueng nyang taat
Ureueng ibadat, masa lam donya
Oh noe keh dilee, haba riwayat
Hai rakan sahbat, tuha ngon muda

Dilikoet yoe lom, dang-dang lon surat
Sajan lon samboet, jibarail teuka
Kisah jibaril , geutron u bumoe
Geucok disinoe, siploh peukara

Keuneubah jameun, ulon peusapat
Haloeh seunurat, ulon peu raya
Rame nyang lakee, bak rayek arah
Ulon seule-ah , seun –seun sibanja

Kisah yoeh lahee, nabi muhammad
Pih kacit tamat, lon saleum haba
Kisah fathimah , mariet ngon peudeung
Atranyan bandum , ka loen pareksa

Mudah – mudahan, mangat bak takheun
Beuthat khat dilon, payah gob baca
Salam alaikom, kawom meutuah
Ngoen Insya allah, tasambong teuma