"MEUKAWEN DUA"

Share This

assalamu'alaikum warahmatullah

jaroe duablah ateuh jeumala

nyoepat bak kamoe nakeuh saboeh kisah

calitra meu olah ureung kawen dua

INOENG

keubit di uloen hantoem na gundah

hate that iklah lam rumoeh tangga

beuthat di abang peng tan geukuebah

hana pih lon pegah bak kaom di lingka

tetapi hay jinoe teupaksa loen peugah

saweub ka teuhah saboeh rahsia

di abang reuncana geuneuk meunikah

ngoen dara nyang ceudah uloen geupeuduwa

geupeugah bajee hana gleh loen rhah

bu pih sabe meuntah hana meurasa

yoeh awai dilee cinta geupeugah

hana meu-ubah sampoe 'an tuha

AGAM

alahay adek nanda meutuah

kupue tapeugah meunan keu kanda

hana di uloen reuncana meunikah

soe keuh nyang peugah haba peusuna

sabe tiep uroe belanja meukeubah

keu gata nyang ceudah nafkah loen peuna

keubit troeh hate uloen ta fitnah

male teuh leupah bak kaoem di lingka

jaoh that ji poe di cicem siwah

loen bileung ka leupah dua negara

beuthat di adek blah deh seulawah

hantoem meu ubah janji ngoen dinda

INOENG

'Oh seupoet uroe cahaya that mirah

bulen that indah meugantoe le sigra

pat keuh neu puduek beulanja neukeubah

jinoe peujeulah hay bang bak dinda

'oh beungoh uroe droe neuh ka leupah

kupi saboeh glah hantoem neurasa

neupeugah kanda harus jak bagah

bek sampe geurhah babah le toke keurija

jamboe bineh blang pha jih ka patah

angen poet bagah reubah lampaya

seupot baroe sa haba that jeulah

bak keude bang dolah gosip meubura

geupeugah keu abang neuk jak meunikah

awai buleun siblah nibak tanggai dua

asoe lam talam keuleuh neukeubah

jeulame pih kapah bak ayah si dara

AGAM

bulat buken le tameh meunasah

kaye geutarah bak mane nyang tuha

beutoi hai adek bit na loen keubah

di yueb peuratah beulanja keu dinda

adek loen sayang gata nyang ceudah

supoe beurakah ta deungoe le gata

pane na gosib bak keude bang dolah

chit tan geupeuhah kadari baroe sa

memang keubit bak buleun peut blah

cahaya that jeulah teuka purnama

pateh hay adek tan loen meunikah

gata chiet nyang pah sidroe lam dada . . .

'oh no keuh dile haba meukisah

neupreh keuh bagah samboengan keu dua

meunyoe na umu tuhan geukeubah

kamoe meulangkah hibur lom gata..