Kisah Umar Bin Khattab Deungon Krueng Nil

Share This

Assalamu’alaikum, warahmatullah

Tapujoe Allah, Azza wa Jalla

Seulaweut saleum, keu Rasulallah

Ateuh sahabah, dan keuluarga

Peungeuh malam, buleun 15 blah

Cahya meu jeureulah, keunoe u donya

Nibak malam nyoe, rakan meutuah

Ca-e lon kisah, Saboh peuristiwa

Bak watee masa, thon 20 Hijriah

Taklok meunyerah, Nanggroe Meuse nama Meuse Mesir

Nibak masa nyan, nyang mat khalifah

Al-Faruq meugah, Sayyidina ‘Uma

Peundudok Meuse, geujak laju bagah

Bak Amr bin ‘Ash, keupercayaan ‘Uma

Wahee e ‘Amru, kamoe neuk peugah

Tradisi wilayah, Endatu peuna

Nyan krueng Nil, ji ilee ka sah

Seubab meutuah, saboh perkahra

Meutan atra nyan, ie akan musnah

Endatu peugah, meunan ka lama

Seu’ot Amru, baci ta jeulah

Kiban keuh kisah, tradisi lama

Meunoe hai tuan, neudeungoe beupah

Malam dua blah, buleun nyoe nyata

Kamoe jak mita, Dara nyang cidah

Lalu ta hiah, pakek mahkota

Tapeusok bajee, nyang indah-indah

Beucanden leupah, nyang aneuk dara

‘Oh kalheuh bandum, hai tuan syiah

Lam krueng Nil bagah, ta rhoem sidara

Meuban geudeungoe, lee ‘Amr bin ‘Ash

Laju geuteugah, hanjeut a’mala

Didalam Islam, Agama Allah

Doausa meuleumpah, nyoe meunan cara

Tradisi meunoe, hanjeut takubah

Payah tarubah, deungon sigeura

Pendudok Meuse, ka teuhah babah

Han geujeut tangah, kundok seumua

Laju geugisa, u rumoh bagah

Malee meuleumpah, salah bicara

Tapi hai rakan, takeudi Allah

hantreb geukeubah, lahee lah bala

Dalam buleun nyan, ka khueng meuleumpah

Krueng Nil meutuah, ie krueng kahana

Sampoe 3 Buleun, meunan keuh ulah

Rakyat ka sosah, ka geuneuk bungka

Geukirem surat, lee ‘Amr bin Ash

Ubak Khalifah, leungkap calitra

Khalifah ‘Uma, sigra geubalah

Si on keureutah, ka geujok teuma

Dalam Krueng Nil, tatiek keureutah

Bak ‘Amr bin ‘Ash, meunan titahnya

Sigra geupubuet, lee ‘Amr bin ‘Ash

Lagee peurintah, saydina ‘Uma

U dalam krueng Nil, geutik keureutah

Lheuh nyan geuminah, geujak woe teuma

Bak singoh uroe, tahoe dum wajah

ie ka meulimpah, didalam kruengnya

Malah kalinyoe, meunyoe di jumlah

ie ka meutamah, 16 Hasta

Bandum ka hireun, illa ‘amr bin ‘Ash

Gobnyan hai sahbah, teupu seubabnya

Nyang na geutuleh, oleh khalifah

Nibak keureutah, nyoe kalimahnya

Haba Endatu Bek Sampee Taboh ~

Assalamu'alaikum kawom sineuna

Allah tapuja Alhamdulillah

Keu Rasulallah rahmat sijahtra

Akan keuluarga ngon para sahbah

Aceh that jaya bak saboh masa

Iskandar Muda nyang mat peurintah

Nibak malam nyoe ca-e lon rika

Keu asoe haba deungoe lon peugah

Ureung meurantoe u malaysia

Ladoem syedara raseuki mudah

Geuwoe u Gampong meuhi ka beda

Bak peugah haba pih ka berubah

Bahsa Melayu Sabee Keulua

Peutimang gaya bak poh beurakah

Sabee beu gobnyan peugah calitra

Watee di Malaya hantom na sosah

Watee uroe jeh lagee biasa

Bajee ulua geusok kupiah

Jinoe hai rakan Fashion leumpahna

'Oek ka meuwarna siluweu beukah

Bahasa Aceh jareung meuhaba

Cuma ngon Mak Wa nyang na geubalah

Meunyoe gob tanyong Kiban peuhaba??

Ape kau Katee geuseu ot bagah

Haba lam ca-e bukon peusuna

Saweub lam nyata lon kalon leumah

Mungken disinoe lam group tercinta

Atra nyan hana bek gata sosah

Meunyoe geutanyoe tan galak bahsa

Cukop cilaka peuragui sudah

Galak sabee tangui bahsa Malaya

Saweub teubawa di Nanggroe keudah

Sabee keudroe-droe gura leumpahna

Tan meubahasa Endatu keubah

Watee meugisa ka u gampong ma

Pakon meubahsa teuceu ek meuleumpah

Meungkon geutanyoe nyang peu mulia

Bahsa Aceh Raya rakan meutuah

Han akan dijak awak laen bangsa

Dijak ngui bahsa nyang gata keubah

Meupat keuh mantong tanyoe beurada

Bek tuwoe bahsa poma deungon Ayah

Digob kop hebat pangkat ngon kaya

Bahsa pusaka hantom jirubah

Ulon peucontoe neukalon nyata

Di Awak cina rata daerah

sabee-sabee droe 'oh jimeu bahsa

Teutap meukata bahsa droe jipeugah

Saweub awak nyan singoh aneuknda

Nak bek jilupa bahsa daerah

Tanyoe meubalek ladoem syedara

Bak meungui bahsa ka salah kaprah